Achille Jubinal, Un dist de Nostre-Dame
word Télécharger le texte en version Word (avec notes)
pdf Télécharger le texte en version PDF (avec notes)
excel Télécharger le texte en version Excel (sans notes)
pdf Télécharger la fiche des manuscrits (PDF)
lien Consulter les manuscrits
lien Consulter l'édition panoptique de ce texte
Le texte
  Œuvres complètes de Rutebeuf, trouvère du XIIIe siècle, recueillies et mises au jour pour la première
  fois par Achille Jubinal, Nouvelle édition revue et corrigée, A. Jubinal, 1874 : Paris, Paul Daffis, vol. 2, pp. 164-168.
   
  Un dist de Nostre-Dame
  Ms. 7615
   
1 De la très glorieuſe Dame
2 Qui eſt ſaluz de cors & d’ame
3 Dirai, que tère ne m’en pui ;
4 Mès l’en porroit avant .i. pui
5 Eſpuiſier c’on poïſt retrère
6 Combinen la dame eſt débonaire.
7 Por ce ſi la devons requerre
8 Qu’avant qu’elle chaïſt ſor terre
9 Miſt Diex en li humilité,
10 Pitiez, douſors & charitez,
11 Tant que ne ſai où je commance :
12 Beſoignex ſui par l’abondance,
13 L’abondance de ſa loance
14 Remue mon corage & change,
15 Si qu’eſprouver ne me porroie,
16 Tant parlaſſe je voudroie.
17 Tant a en li de bien à dire
18 Que trop eſt belle la matire :
19 Se j’eſtoie bons eſcrivens
20 Ainz ſeroie d’eſcrire vains
21 Que je vous euſſe conté
22 La tierce part de ſa bonté
23 Ne la quarte ne redeiſme.
24 Se ſet chacuns par lui-méiſme,
25 Qui orroit comment elle proie
26 Celi qui de ſon cors fiſt proie
27 Por nous tous d’enfer deſpraer,
28 C’onques ne veſt le cors deſpraer,
29 Ainz fu par nos praez & pris
30 Dou feu de charité eſpris ;
31 Et tot ce li ramantoit-elle ;
32 La très douce Virge débonaire :
33 « Biaus filz, tu ſuis fame & home,
34 Quant il orent mors en la pome,
35 Il furent mort par le pechié :
36 Dou maufez eſt toz entechiez ;
37 En enfer il dui deſcendirent
38 Et tuit cil qui d’eus iſſirent.
39 Biaux chiers fis, il t’empriſt pitiez
40 Et tant lor montras d’amitiez
41 Que por aus decendis ès ciaus :
42 Li deſſandres fu bons & biax.
43 De ta fille féis ta mère ;
44 Tiex fu la volanté dou père.
45 De la crèche te fit-on coche ;
46 Sans orguel eſt qui là ſe couche.
47 Porter te covint en Égypte ;
48 La demorance i fu petite,
49 Car après toi ne veſqui gaires
50 Tes anemis, li deputaires
51 Hérodes, qui fiſt decoler
52 Les inocens & afoler,
53 Et deſmembrer par chacuns membre,
54 Si com l’Eſcriture remembre.
55 Après ce revenis arrière :
56 Jui refirent belle chière,
57 Car tu lor montroies ou Temple
58 Maint bel mot & maint bel example :
59 Mout lor plot canques tu déis
60 Juqu’à ce tens que tu féis
61 Ladre venir de mort à vie ;
62 Lors orent-il ſor toi envie,
63 Lors fus d’aus huiez & haïz,
64 Lors fus enginiez & traïz
65 Par les tiens & à aus bailliez.
66 Lors fus penez & travillez,
67 Et lors fus liez à l’eſtache ;
68 N’eſt nus qui ne le croie & ſache.
69 Là fus batuz & deplaiez,
70 Là fus de la mort eſmaiez,
71 Là te covint porter la croiz,
72 Où tu crias à haute voiz
73 Au Juis que tu ſoif avoies ;
74 La ſoif eſtoit que tu ſavoies
75 Tes amis mors & à malaiſe
76 En la dolor d’enfer punaiſe.
77 L’âme dou cors fu en Enfer
78 Et briſa la porte d’enfer ;
79 Tes amis treſſis de léans ;
80 Ainc ne remeſt clerc ne lai anz.
81 Li cors remeſt en la croiz mis :
82 Joſeph, qui tant fu tes amis,
83 A Pilate te demanda ;
84 Li demanders mout l’amanda.
   
85 « Lors fu ou ſépucre poſez.
86 De ce ſu hardiz & oſez
87 Pilate, qu’à toi garde miſt,
88 Car de folie ſ’entremiſt.
89 Au tiers jors fu reſuſcitez :
90 Lors fu & cors & déitez
91 Enſamble ſans corricion,
92 Lors montas à l’Aſcencion.
   
93 « Au jor de Pentecouſte droit,
94 Droit à celle hore & à cel androit
95 Que li apoſtres èrent aſſis
96 A la table chacuns pencis,
97 Lors envoias-tu à la table
98 La toe grâce eſperitable
99 Dou Saint-Eſpérit emflamée,
100 Que tant fu joïe & amée.
101 Lors fus chacuns d’aus ci hardiz,
102 Et par paroles & par diz,
103 C’autant pris a mort comme vie :
104 N’orent fors de t’ amor envie.
105 Biax chiers fiz, por l’umain lignage
106 Jeter de honte & de domage
107 Féiſt tote ceſte bonté,
108 Et plus aſſez que n’ai conté.
109 S’or laiſſoies ſi eſgaré
110 Ce que ſi chier as comparé,
111 Ci auroit trop grand meſpriſon :
112 S’or les leſſoies en priſon
113 Entrer don tu les as oſté,
114 Car ci auroit trop mal hoſté,
115 Trop grant duel & trop grant martire,
116 Biau filz, biau père, biau doz ſire. »
117 Ainſi recorde tote jor
118 La doce Dame ſans ſéjor :
119 Jà ne fina de recorder ;
120 Car bien nous voudroit recorder
121 A li, don nos nos deſcordons
122 De ſa corde & de ſes cordons.
123 Or nous acordons à ſ’acorde.
124 La Dame de miſéricorde
125 Et li prions que nous acort
126 Par ſa pitié au dine acort
127 Son chier fil, le dine cor Dé[1] :
128 Lors ſi ſerons bien racordé[2].
   
  Explicit de Nostre-Dame.
 

[1] Le dine cor Dé, le digne corps de Dieu.

[2] Voyez, pour des cacophonies semblables et sur le même mot, les strophes deuxième et cinquième de la pièce intitulée : Le Diz des Cordeliers.

...

Valid XHTML 1.0 Transitional